古埃及作為世上五大人類文明發源地之一，以往一直都係唔少影視作品嘅題材，現實亦都出土過唔少珍貴嘅文物同埋古蹟，而近日考古學家就喺呢個地方又解開咗一啲新嘅謎團。

早喺1922年，英國考古學家Howard Carter就喺帝王谷發現到古埃及第18王朝嘅圖坦卡門法老墓，而喺呢度學界就得知有64座古墓，對照返圖坦卡門嘅族譜，估計就有幾個成員嘅身份仲未曝光，當中埃及王后-娜芙蒂蒂係咪其中之一，就一直都係考古學家想要解開嘅謎題。

為咗解開呢個難題，埃及就展開百年以嚟最大嘅考古發掘計劃，以150人嘅團隊進入呢個酷熱嘅沙漠，尋找呢位埃及傳奇王后嘅陵墓。團隊以為期6個月嘅時間以人手進行掘挖，過程中唔單止搵到三十幾棟石屋，其中仲有唔少家具、珠寶、花樽，似乎係帝王后妃嘅一個陪葬品工坊。而最重要嘅係，考古團隊搵到一個比黃金更加珍貴嘅白銀戒指以及一具女性木乃伊遺骸，而且身上仲用到繁複精良嘅乾屍化工法，所以身份必定係一位王室成員，但到底係咪娜芙蒂蒂呢？就需要大家拭目以待喇！

原圖嚟自網絡